1390. August 2. Krappitz

Ich Tempchen foyt vnde wir Rotmanne czu Crappicz, Arnold von der Steynaw, Jorge vndt Petir Odrencz vnde Niclos Coser, wir bekennen Offintlichen in desim keginwirtigen brife allin dy desin briff sehin vnd horin lezen, das vor vns qwomen dy bedirlewthe, Pawlicza vnde Nickel Marus mit Irn fründen, vnde vorlegetin vns wy das sy her Niclos vörwaser des Clostirs czu Czarnowans hatte in den Ban broclit ümb en walt vnd ümb wezyn dy do gehören czu der Zewsil, do vrogete wir Pawliczen vnd Nickeln Marus vnde ir fründe, von wannen in der walt vnd dy wezin wordin weren, do sprach Pawlycza vnde syne fründe das syn vatir Przibke dirdynet hette am Clostir, das in der Probyst vnde das Couent gap demselbin walt vnde dy wezin in der mose, das sy alle ior en halbe marc rechtis ierliches Czinses gobin dem Clostir ken Czarnowans, vnde Nymande andirs, vnd do fyle wir dirczwischen vnde nomen dy zachen czu vns czwischen her Niclos vorwaser des Clostirs czu Czarnowans vnde dem selbin Pawlyczen vnd Nickeln Marus vnde irn frunden. Do saczten sy ir zachen beydirseyt czu vns, do vorrychte wir sy lyplichen vnde guttlichen mit her Niclos vorwaser des Clostirs czu Czarnowans, alzo das sy alle ior von dem vorgenantin walde vnd wezin suldin gebin en marc rechtis ierliches Czinses dem Clostir ken Czarnowans Ebeclichen, vnde dor noch Pawlycza mit synen frunden gelobetin vor vns, ap der walt vnde dy selbin wezin ymmer feyl worden, das sy das dem vorgenantin Clostir nicht entvremdin weldin, Sundir dem Clostir, von dannen is in bekomen wcre, gunnen, vnde des czu ein rechtin bekentnos habe wir der Stat Ingezegil losin an hengin an desin brif, der gegabin vnde geschan ist noch Cristus geburt Dreyczenhundirt ior vnde in dem Newnczigsten iore am nestin dinstage noch ad Vincula Petri apostoli czu Crappicz.

Das Siegel fehlt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.